i tašitheydan

U lëšono kmasër wu Sëryoyo khoye ba zmirotho, ba tašëcyotho uba lebawotho da zcure

Nunto nunto ba maye

Zmar cami Nunto, dëkzëmro bu lëšoneydan u Sëryoyo, u lëšono dmëjğele ebe Moran Yešuc Mšiho cali yarco. 

Ëno ešmi Refka yo, mawëldono uyariwono b’Mërde bu teymanmadënho d’Tërkiya. Bcëmro nacimo athyono l’Hollanda u hawili 30 ëšne dëkcayšono harke. Sideyna bu bayto mëjğolinawo Sëryoyo. Yalifono u lëšono Sëryoyo belhude bu mamlo ubu šmoco.

Bi qritho d’Dedemsvaart b’Hollanda, i duktho dëkcayšiweyna latwo nošo Sëryoyo dqudrina mëjğolina acme u lëšono Sëryoyo. Mawxastene u lëšoneydan u Hollandoyo qadirina maqwenale. U cal dlabicono u abreyde dgorëš casqutho bu ylofo du lëšono Hollandoyo u dlo foyëš mwaxro bi madrašteyde; mëjğeli acme belhude bu lëšono Hollandoyo. Caman ëšne dšafici, u abreydi yalëf u lëšono Sëryoyo elo grëšle acme hem zabno uhemstene casqutho. Ucdo dëkhayrono lu zabnawo udëkmëftakrono, lešanistene ğalabe casqowe dmawlëfalle u lëšono Sëryoyo. Camgabëdathe, ğer me kmo zmirotho dyalifanwolën mu Ewangelyun awstene dfayiši mu Sayfo dan 1915, ludcoweyno ğer zmirotho hrene dzëmralle.

Qayo zmirotho u tašëcyotho da nacime?

Krëhmono ğalabe a lëšone udilonoyithstene u lëšono Suryoyo, ulëšono emhoyeydi uyatiroyith dkëtyo ulëšono dmëjğele ebe Moran Yešuc Mšiho. Camgabëdathe krëhmono a nacime, a zmirotho da nacime wa tašëcyotho da nacime. Man lëkodëc a tašëcyotho d’Sindirella udi tlitho di qubcitho Sëmëqto. U man lëkëmnamnëm ulëkmašrëq inaqla dkëtyo fsihoyo? U mëqqa basëmyo ha bu lëšono di emeyde dqodër šomëc, hoze, soyëm uhatta dholëm umedano🥰?

Cal dëhzeli i sniqutho dkito la zmirotho da nacime ula tašëcyotho basime da nacime, mhalaqli idawsathe. Lešan dsaymono mede lu lëšono Sëryoyo wa nacime kulle dqudri yëlfile. U hawxa kfayšo i asirutho cami tawditho, cama waride, cami mardutho u camu lëšoneydan u emhoyo dkëtyo qum tcoyo u tyomo dtorinale ba haye. Fsihaytono dlatno belhude dëkmëlbokono bu medano. Kmësnodono mi iqartheydi uman ahunoneydi dkëtne šğimoye bu syomo da filime du karton bu lëšono Sëryoyo lešan a nacime.

Aydarbo mšareli bu zmoro?

Mšareli i šato da 2008 bu tërjomo uba 2018 bu zmoro dë zmirto dkëtwa rhëmto cal lebi. İ zmërto “d’Nunto nunto ba maye.”

Be bzabno, i Nunto mšawšatla ruha uhawila mhirwotho hathe. İ Nunto kiba fayëš zëmro, qulco daroğto u këtla mabco dyulfo wëdsaymo heš medone hrene. Hatste këbcët dhowët acmeyna? Mawsi harke i Nunteydëx-dox umeštawtëf hatste li marditho di Nunto! 

U Hëzweydi, u lëšono Sëryoyo calu darbo da zmirotho da nacime, da tašëcyotho uda filime da kartone (du šroro këtli ğalabe medone dkëbcono saymallën bas bëthër gëmahkëyallën) zëttër dmišawšët yo. U medano hem digital calu darbo di medya uhemstene kibe dhowe bë kthowo, bšecyo awstene b’ohadto dmibarbëz bdarğo umthonoyo u emwotoyo yo. 

Ëno latno yadëcthonitho du lëšono elo calu darbo du teštcënyo këbcono dmawlëfono u lëšono la nacime. Camgabe dëkmëftakrono, dëkkëthwono udëkzëmrono zmirotho da nacime; kmahkëyonostene tašëcyono da nacime. Horu u msanetu cala zmirotho wa tašëcyotho dkëtne harke laltaht. Qadirit dudcit u qoleydi?

Këbcët dudcët heš mën medone hrene kito athoye? Mcaqëb Alpha Nunto Production u menkulfrus Suryoyo Cartoons!

 

Haddune mu lebo!

Refka Kangus